हालै नेपालमा JBL ले ‘Go4’ नामको सानो ब्लुटुथ स्पिकर सार्वजनिक गरेको छ। अन्तर्राष्ट्रिय युट्युब टेक रिभ्युवरहरूले यसलाई राम्रो ‘बजेट’ स्पिकर भनेका छन् र नेपाली रिभ्युवरहरू पनि यसलाई ‘बजेट’ स्पिकर भनेरै प्रस्तुत गरेका छन्।

अमेरिकामा प्रति व्यक्ति आय ३५ हजार अमेरिकी डलर भन्दा बढी छ भने नेपालमा करिब १,५०० डलर मात्र। अमेरिकामा ६० डलरको ग्याजेट ‘बजेट’ होला तर नेपालमा पनि त्यही शब्द जस्ताको तस्तै प्रयोग गर्नु कति उपयुक्त होला? यसले धेरै टेक रिभ्युवरहरूले देश अनुसारको आर्थिक वास्तविकता नबुझी बाहिरको रिभ्यु र चल्तीका शब्दहरू मात्रै दोहोर्याइरहेको जस्तो देखाउँछ।

वा, सायद वास्तविकता नै भिन्नै छ। हुन सक्छ नेपालमा पनि मानिसहरूले यस्ता महँगा ग्याजेट सहजै किनिरहेका छन्, हाम्रो खर्च गर्ने शक्ति निकै बढिसकेको छ। अनि यस्ता महँगा सामानमा खर्च गर्न नसक्ने मान्छे म मात्रै हुँ। आज पनि २० हजार रुपैयाँको मोबाइल किन्न मैले २० वटा रिभ्यु भिडियो हेरेको सम्झना ताजै छ। अहिले पनि त्यही फोन नै मेरो मुख्य फोन हो।